ආයුධ බලය ගැන තිබූ අධිමානය සහ නිවැරදි දේශපාලන ප‍්‍රවේශයක් නොමැති වීම යන ප‍්‍රධාන කරුණුත් තවත් අනු කරුණු රැසකුත් මුල්කරගෙන LTTE සංවිධානය සහ නායකත්වය ශ‍්‍රී ලංකාවේ හා ලෝකයේ ඉතිහාසයට එක්වී හමාරය. නමුත් අවසන් වූයේ LTTE සංවිධානයේ මිනිස් බලය හා ආයුධ බලය පමණි. ඔවුන් විසින් නියෝජනය කළ මතවාදය මල්ටිබැරල් ගසා විනාශ කර දැමිය නොහැකිය. එය වත්මන් ශ‍්‍රී ලංකාවේ දේශපාලනය නම්වූ සන්ධර්භය තුළදී සිංහල-බෞද්ධ මතවාදය හමුවේ යටපත් වූවා පමණි.LTTE ය දැරූ මතවාදය කුමක්දැයි අප මුලින්ම නිශ්චය කරගත යුතු වන්නේය. LTTE ය ප‍්‍රධාන වශයෙන්ම දැරූ මතය වන්නේ ද්‍රවිඩ ඊලාම් රාජ්‍යය පිළිබඳව වූ මතයයි. වඩුක්කෝඩෙයි ගිවිසුම, තිම්පු සාකච්ඡා, කලූ ජූලිය, හරහා විත් පේ‍්‍රමදාස-චන්ද්‍රිකා-රනිල්-මහින්ද සාකච්ඡා බිඳ ගනිමින් මාවිල්ආරුවට එන විට ප‍්‍රභාකරන් සතුව ඊලාම් සිතියමක්, ඊලාම් බැංකු, උසාවි, පොලීසි, ආදිය පැවතීමෙන්ම වෙනම රාජ්‍යයක සිහිනය ගැන කරුණු මනාවට පසක් වේ. මේ ඊලාම් රාජ්‍යය මතවාදය පිළිබඳව නම් කීමට ඇත්තේ එක දෙයකි. එනම් ප‍්‍රභාකරන් සමගම මෙයද වලපල්ලට ගිය බවයි. මක්නිසාද යත් මෙහි සැබෑ නිර්මාතෘ වන්නේද ඔහුය. එසේම මෙය ප‍්‍රායෝගික තලයේ ක‍්‍රියාත්මක කළේද ඔහුමය. (චෙල්වනායගම්ලා, පොන්නම්බලම්ලා, වරදරාජලා, මතවාදීමය තලයේ නිශේධනාත්මක අදහස් දැක්වීම් කළද ප‍්‍රායෝගික තලයේ මෙය ක‍්‍රියාවට නැංවූයේ ප‍්‍රභා පමණි.)
LTTE ය දැරූ සැබෑ මතවාදය මෙය වුවද LTTE ය විසින් තව පිරිසකගෙන් උදුරාගත් මතවාදයක්ද තමන්ගේ කරගැනීමටද කටයුතු කරන ලදි. එය මෙවැනි අන්ත ජාතිවාදයක් නියෝජනය කරන්නක් නොවේ. එය සැබෑ දෙමළ ජනතාවගේ අවශ්‍යතවය ගැන කියවෙන් දෙයකි. ඒ වූකලී ද්‍රවිඩ ජනතාවගේ අයිතීන් පිළිබඳව වූ මතවාදයයි. මෙය නම් සැබෑ ලෙසටම නියෝජනය කළේ කවුද යන්න සෙවීමට ගියහොත් අප අනිවාර්‍යයෙන්ම අමාරුවේ වැටෙනු ඇත. නමුත් ප‍්‍රජාතන්ත‍්‍රීය ප‍්‍රවේශයක් තුළ සිට ද්‍රවිඩ ජනතා නියෝජිතයන් මෙය නියෝජනය කරනවා ඇතැයි දෙමළ ජනතාවද විශ්වාස කළ බැවින් ඔවුන් මෙම මතවාදය දැරුවා යැයි අපටද අනුමාන කිරීමට වන්නේය. කෙසේ වුවද ප‍්‍රභා
කරන් විසින් මෙම මතවාදය තමන්ගේ කර ගැනීමට මෙහෙයුමක් දියත් කළේය. ඒ අනුව ද්‍රවිඩ මන්ත‍්‍රීවරු, ද්‍රවිඩ බුද්ධිමතුන් සහ අනෙකුත් ද්‍රවිඩ නියෝජිතයන් (EPDP, PLOT, TELO EROS වැනි) සියල්ලම පාහේ ඝාතනය කරමින්ද බිය වද්දා පන්නා දමමින්ද එම මතවාදයද තමාගේ කරගැනීමට ප‍්‍රභා කටයුතු කළේය. ඒ හරහා ඔහු ද්‍රවිඩ ජනතාවගේ එකම නියෝජිතයා බවට පත්වීමටද වෙර දැරුවේය.මේ අනූව ප‍්‍රභාකරන් මිය ගියද මේ දෙමළ ජනතාවගේ අයිතීන් පිළිබඳව වූ මතවාදය මිය ගියේ නැත. මක්නිසාද යත් එහි නිර්මාතෘ ඔහු නොවේ. එසේම ඔහු එය සැබෑ ලෙසම ක‍්‍රියාවට නැංවූයේද නැත. එබැවින් ද්‍රවිඩ ජාතිවාදය සිංහල ජාතිවාදය හමුවේ මරා දැමුවද ද්‍රවිඩ ජනතාවගේ අයිතීන් පිළිබඳව වූ මතවාදය එලෙස මරා දැමීමට බැරිය. එය වත්මන් තත්වය හමුවේ කෙටිකාලීනව දණ නමා ඇත්තේය.
මී ලඟට බැලිය යුතු දෙය වන්නේ ශ‍්‍රී ලංකාවේ දේශපාලන සන්ධර්භය තුළ LTTE ය විසින් ඉඩක් ලබාගෙන සිටියේද යන්නය. මා මුලින් කී පරිදි LTTE යේ විනාශයට මුල් වූයේද නිවැරදි දේශපාලනමය ප‍්‍රවේශයක් නොතිබීමයි. එනම් යුධමය අතින් යම් යම් ජයග‍්‍රහණයන් ලද පසු තමා සතුව තිබෙන කේවල් කිරීමේ ශක්තියත් තමා දිනා සිටින භූමිය සහ ජනතාව යන ශක්තීනුත් යොදාගෙන රටේ දේශපාලනිකමය බලයක් ලබාගැනීමට උත්සහ කළ යුතුය යන්නයි. නමුත් එය සාකච්ඡා වලින් (ගිවිසුමක් හරහා) ප‍්‍රාදේශීය පාලනයක් ගන්නවාට වඩා එහා ගිය තත්වයක් විය යුතුමය. ප‍්‍රභාකරන් විසින් මෙය කිරීමට අසමත් වූ බව සැබෑවකි. නමුත් ඉතිහාසය දෙස උවමනාවෙන් නැවත හැරී බලන අයෙකුට මෙම අවස්ථාවන් නිසැකවම මතකයට නැගෙනු ඇත.
1 පොන්නම්බලම් 50-50 ඉල්ලීම
2 බණ්ඩා-චෙල්වා ගිවිසුම
3 ඩඞ්ලි-චෙල්වා ගිවිසුම
4 වඩුක්කෝඩෙයි ගිවිසුම හා තිම්පු සාකච්ඡා
5 කලූ ජූලිය
6 ඉන්දු ලංකා ගිවිසුම
7 පේ‍්‍රමදාස සාකච්ඡා
8 චන්ද්‍රිකා සාකච්ඡා
9 රනිල් සටන් විරාම ගිවිසුම
10 මහින්ද සාකච්ඡා
මේ සියල්ල දේශපාලනික සිදුවීම්ය. ඒ පමණක් නොව මහින්ද ආණ්ඩුව 2005 සිට අද වන තුරුම සෑම ඡන්දයක්ම දිනා ගත්තේද මේ යුද්ධය උකසට තැබීමෙන්ය. ඒ අනූව මෙම ගැටළුව 80% ක් පමණ දේශපාලනික තලයේ සිදුවූ Game එකක් බව පැහැදිලිය. එබැවින් මේ ද්‍රවිඩ ජනතාවගේ අයිතීන් යන මතවාදයටද දේශපාලන තලයේ සැලකිය යුතු තරමේ ඉඩක් වෙන්ව තිබුණේය. (ඒ මනෝගනේෂන්, ආනන්ද සංගරී, ඩග්ලස් දේවනන්ද වැනි අය පාර්ලිමේන්තුව තුළ පුටු රත්කළ නිසා නොව ප‍්‍රභාකරන්ගේ ක‍්‍රියාකාරීත්වය නිසා මෙය දේශපාලනික ප‍්‍රපංචයක් ලෙස මතුවී ආ බව කිව යුතුය.)
මේ අනූව ප‍්‍රභාකරන් හා LTTE යේ අභාවයත් සමගම මේ ද්‍රවිඩ ජනතාවගේ අයිතිවාසිකම් යන මතවදය භාරගැනීමට VACANCY යක් ඇතිවී තිබේ. (නමුත් මේ මොහොතේ මෙය භාරගැනීමට උත්සහ දරන්නන්ට ඊලාම් මතවාදය පටලවමින් ටිකට් එක ලබා දීමට තරම් ආණ්ඩුව උපායශීලී බවටද අනතුරු ඇඟවීමට කැමැත්තෙමි) මේ අනූව මෙය භාරගෙන ප‍්‍රජාතන්ත‍්‍රීය ප‍්‍රවේශයක් හරහා ගියහොත් ශ‍්‍රී ලංකා දේශපාලන වේදිකාවේ සැලකිය යුතු මට්ටමේ චරිතයක් නිරූපණය කිරීමටද අවස්ථාවක් බිහිව පවතින්නේය. (ප‍්‍රධාන නළුවාම නොවුනට මෙය සහය නළුවෙකුගේ චරිතයකි)මේ පිළිබඳව ඉව වැටුණු කීප පලක්ම මේ වන විට කරට කර තරඟ කරමින් මේ chance එක ගැනීමට උත්සහ දරති.
1 ශ‍්‍රී ලංකා නිදහස් පක්ෂයේ විනයාගමූර්ති මුර්ලිදරන් ඇමතිතුමා (කරුණා යැයි කීම මදිකමක් බැවින්)
2 EPDP නායක ඩග්ලස් දේවානන්ද ඇමතිතුමා
3 බස්නාහිර ජනතා පෙරමුණේ නායක මනෝගනේෂන් මන්ත‍්‍රීතුමා
4 ද්‍රවිඩ ජාතික සන්ධානයේ ආනන්ද සංගරී මන්ත‍්‍රීතුමා
ආදීන් මේ අංක එකේ සටනට සැරසී සිටිති. මීට අමතරව KPද ප‍්‍රභාගේ අඩුව පිරවීමට උත්සාහක් ගත්තේය. නමුත් එය සැබෑ ලෙසට ප‍්‍රභාකරන් Part 11 වූ බැවින් ගෝඨාභයගේ දරුණු වාග් ප‍්‍රහාර හමුවේ පසුබසින්නට ඔහුට සිදුවිය.
මීට අමතරව (මේ මොහොතේ කළඑලි නොබැස්සද) ඉදිරි දිනවලදී EPDP, PLOT, TELO, EROS වැනි පැරණි සංවිධාන වල නව සම්ප‍්‍රාප්තිකයන්ද මේ දේශපාලනික Game එකට සෙට් වීමට නියමිතය. පවතින යුධ උණුසුම හරහා කික් වුණු සමාජය ක‍්‍රමයෙන් නිවීයත්ම ජනතාවට ඊලාම් මතවාදය ක‍්‍රමයෙන් අමතක වී යන විට) දෙමළ ජනතාවගේ අයිතීන් වෙනුවෙන් යැයි කියමින් මේ පිරිස වේදිකාගත වීමට නියමිතය.
නමුත් අප මතකයේ තබාගත යුතු දෙයක් තිබේ. මේ නියෝජිත පිරිස හැමදාම කළේ දෙමළ ජනතාව දඩමීමා කරගෙන තමන්ගේ බඩවියත රැකගැනීමයි. ඔවුන් දෙමළ ජනතාවට දිනා දුන් දායාදය දැකීමට නම් වන්නියේ අවතැන් කඳවුරකට යා යුතුය. (කොළඹ AC කාමර වල පහස ලබන ඔවුන් මේවා දන්නේ නැත) ඒ ඉතිහාසයේ දෙමළ නියෝජිතයන් වූ (හෙට අනිද්දා නැවත එ්මට නියමිත) පිරිස තම දෙමළ ජනතාවට දිනා දුන් දෙයයි. සැබැවින්ම මේ පිරිස මෙතෙක් සිටියේ නැට්ට - - ගසාගෙනය. එතරම් පිට මොවුන් ආයෙත් ලැජ්ජා නැතුව ජනතාවගේ ඉදිරියට එන්නේ කෙසේදැයි අපට නමි සිතා ගැනීමටවත් බැරි දෙයකි. නමුත් ඔවුන් මෙය කිරීමට දෙවරක් නොසිතන බව නම් නිසැකය.
එබැවින් අහිංසක දෙමළ ජනතාවට කීමට ඇත්තේ මෙපමණකි. ප‍්‍රභාකරන් සුන්දර රටක් ගැන සුරංගනා කතා කියා ඔබට ලබා දුන්නේ ඔය දෙයයි. හෙට අනිද්දාම මේ නරුමයන් සුන්දර ලෝකයක් ගැන සුරංගනා කතා කියන්නට ඔබ ලඟට එනු ඇත.
ප‍්‍රවේශමෙන්..........................
